ਨਵੀਂ ਦਿੱਲੀ- ਕੋਵਿਡ-19 ਦੀ ਪਹਿਲੀ ਲਹਿਰ ਤੋਂ ਬਾਅਦ, 31 ਅਗਸਤ ਤੋਂ ਹਵਾਈ ਕਿਰਾਏ ਦੀ ਸੀਮਾ ਹਟਾ ਦਿੱਤੀ ਜਾਵੇਗੀ। ਕਰੀਬ 27 ਮਹੀਨਿਆਂ ਬਾਅਦ ਹਵਾਈ ਕਿਰਾਏ ‘ਤੇ ਇਸ ਕੈਪ ਨੂੰ ਹਟਾਇਆ ਜਾ ਰਿਹਾ ਹੈ। ਇਸ ਨਾਲ ਤਿਉਹਾਰਾਂ ਦੇ ਸੀਜ਼ਨ ‘ਚ ਯਾਤਰਾ ਕਰਨ ਵਾਲਿਆਂ ਨੂੰ ਕਿਰਾਏ ‘ਚ ਰਾਹਤ ਮਿਲਣ ਦੀ ਉਮੀਦ ਹੈ। ਸਰਕਾਰ ਨੇ ਕਿਰਾਏ ਦੀਆਂ ਉਪਰਲੀਆਂ ਅਤੇ ਹੇਠਲੀਆਂ ਦੋਵੇਂ ਸੀਮਾਵਾਂ ਤੈਅ ਕੀਤੀਆਂ ਸਨ। ਇਸ ਕਾਰਨ ਏਅਰਲਾਈਨਜ਼ ਲਈ ਕਿਰਾਇਆ ਨਿਰਧਾਰਤ ਦਾਇਰੇ ਵਿੱਚ ਰੱਖਣਾ ਮਜਬੂਰੀ ਬਣ ਗਿਆ ਹੈ। ਹਾਲਾਂਕਿ ਹੁਣ ਏਅਰਲਾਈਨਜ਼ ਆਪਣੀ ਮਰਜ਼ੀ ਮੁਤਾਬਕ ਕਿਰਾਏ ‘ਚ ਵਾਧਾ ਜਾਂ ਕਮੀ ਕਰ ਸਕਣਗੀਆਂ।
ਤਿਉਹਾਰੀ ਸੀਜ਼ਨ ‘ਚ ਕਈ ਏਅਰਲਾਈਨਜ਼ ਆਫਰ ਦਿੰਦੀਆਂ ਹਨ, ਜਿਸ ‘ਚ ਕਿਰਾਇਆ ਕਾਫੀ ਘੱਟ ਕੀਤਾ ਜਾਂਦਾ ਹੈ। ਕੀਮਤਾਂ ਤੈਅ ਹੋਣ ਦੀ ਸੂਰਤ ਵਿੱਚ ਕੰਪਨੀਆਂ ਅਜਿਹਾ ਨਹੀਂ ਕਰ ਪਾਉਂਦੀਆਂ ਪਰ ਹੁਣ ਫਿਰ ਤੋਂ ਏਅਰਲਾਈਨਜ਼ ਗਾਹਕਾਂ ਨੂੰ ਲੁਭਾਉਣ ਲਈ ਸਸਤੀਆਂ ਟਿਕਟਾਂ ਦੇ ਸਕਣਗੀਆਂ। ਇੱਕ ਆਦੇਸ਼ ਵਿੱਚ, ਸ਼ਹਿਰੀ ਹਵਾਬਾਜ਼ੀ ਮੰਤਰਾਲੇ ਨੇ ਕਿਹਾ ਕਿ ਘਰੇਲੂ ਉਡਾਣਾਂ ਦੀ ਮੌਜੂਦਾ ਸਥਿਤੀ ਅਤੇ ਯਾਤਰੀਆਂ ਵਿੱਚ ਹਵਾਈ ਯਾਤਰਾ ਦੀ ਵੱਧਦੀ ਮੰਗ ਦੀ ਸਮੀਖਿਆ ਦੇ ਮੱਦੇਨਜ਼ਰ, 31 ਅਗਸਤ 2022 ਤੋਂ ਕਿਰਾਏ ਬੈਂਡ ਨੂੰ ਹਟਾਉਣ ਦਾ ਫੈਸਲਾ ਕੀਤਾ ਗਿਆ ਹੈ।31 ਅਗਸਤ ਤੋਂ ਏਅਰਲਾਈਨਜ਼ ਘਰੇਲੂ ਉਡਾਣਾਂ ਦਾ ਕਿਰਾਇਆ ਆਪਣੀ ਇੱਛਾ ਮੁਤਾਬਕ ਤੈਅ ਕਰ ਸਕਣਗੀਆਂ। ਇਹ ਗੱਲ ਯਾਤਰੀਆਂ ਦੇ ਹੱਕ ਵਿੱਚ ਕਿਸੇ ਵੀ ਦਿਸ਼ਾ ਵਿੱਚ ਉਲਟ ਸਕਦੀ ਹੈ। ਜੇਕਰ ਏਅਰਲਾਈਨਾਂ ਤਿਉਹਾਰੀ ਸੀਜ਼ਨ ‘ਚ ਛੋਟ ਜਾਂ ਆਫਰ ਦੇ ਕੇ ਯਾਤਰੀਆਂ ਨੂੰ ਲੁਭਾਉਣ ਦੀ ਕੋਸ਼ਿਸ਼ ਕਰਦੀਆਂ ਹਨ, ਤਾਂ ਸਪੱਸ਼ਟ ਹੈ ਕਿ ਉਨ੍ਹਾਂ ਨੂੰ ਸਸਤੇ ਭਾਅ ‘ਤੇ ਟਿਕਟਾਂ ਮਿਲਣਗੀਆਂ। ਹਾਲਾਂਕਿ, ਏਅਰਲਾਈਨਾਂ ਕਿਰਾਏ ਵਿੱਚ ਹੋਰ ਵਾਧਾ ਵੀ ਕਰ ਸਕਦੀਆਂ ਹਨ ਕਿਉਂਕਿ ਇਸਦੀ ਉਪਰਲੀ ਲਿਮਿਟ ‘ਤੇ ਕੋਈ ਪਾਬੰਦੀ ਨਹੀਂ ਹੈ।ਮਈ 2020 ਵਿਚ, ਸਰਕਾਰ ਨੇ ਘਰੇਲੂ ਉਡਾਣਾਂ ਦੇ ਕਿਰਾਏ ‘ਤੇ ਉਪਰਲੀ ਅਤੇ ਹੇਠਲੀ ਲਿਮਿਟ ਲਗਾ ਦਿੱਤੀ ਸੀ। ਇਹ ਪਹਿਲੇ ਲੌਕਡਾਊਨ ਤੋਂ ਬਾਅਦ ਹਵਾਈ ਯਾਤਰਾ ਮੁੜ ਸ਼ੁਰੂ ਹੋਣ ਦੇ ਸਮੇਂ ਕੀਤਾ ਗਿਆ ਸੀ। ਸਰਕਾਰ ਨੇ ਪਿਛਲੇ ਸਾਲ ਅਕਤੂਬਰ ‘ਚ 100 ਫੀਸਦੀ ਯਾਤਰੀ ਸਮਰੱਥਾ ਵਾਲੇ ਜਹਾਜ਼ਾਂ ਦੇ ਸੰਚਾਲਨ ਦੀ ਇਜਾਜ਼ਤ ਦਿੱਤੀ ਸੀ ਪਰ ਇਹ ਕੈਪ ਨਹੀਂ ਹਟਾਈ ਗਈ ਸੀ। ਦੱਸ ਦੇਈਏ ਕਿ ਇਹ ਕੈਪ ਛੋਟੀਆਂ ਏਅਰਲਾਈਨਾਂ ਅਤੇ ਯਾਤਰੀਆਂ ਦੇ ਹਿੱਤਾਂ ਦੀ ਰੱਖਿਆ ਲਈ ਲਗਾਈ ਗਈ ਸੀ।
